Sali Dani

Nach em erschte Mal im Auto sitze, hett ich aso nie im Läbe dra dänkt, dass Autofahre mal so Spass chan mache und dass ich dänn grad au no d’Autoprüefig bim erschte Mal bestahne! Aber dank dir hät die ganzi Sach beschtens klappet und dadefür wett ich der namal ganz herzlich danke säge!

Sonen nette und geduldige Fahrlehrer näbed eim uf em Biifahrersitz z ha, bringts ebe scho 🙂 Ich bin immer gern mit dir go umekurve, wills amigs eifach witzig gsi isch! 🙂

Wiiterempfehle wird ich dich uf alli Fäll, häsch dini Sach super gmacht! Würd mal säge, wirsch mini beide Brüedere au mal no z’Gsicht becho 🙂

Mach wiiter so, gueti Ziit und mer gseht sich!

Liebi Grüess, Sarah

P.S. Obwohl s’Rückwärtsfahre nöd min beschte Fründ gsi isch, bini aso gottefroh, hämmer das so oft gmacht, hans nämlich geschter ganzi zweimal müese aawände ,-)

Hoi Dani

En letschter zyt semmer metenand omekurvt ond du hesch mer met dinere ruige ond sympatische art s autofahre bibrocht. D fahrstonde send emmer

abwächsligsrich gsi ond du hesch mech sehr kompetent en strosseverkehr igfüehrt. Es esch en mega gueti zyt gsi! Ich tue dech sehr gärn wiiterempfähle … em strössli ond au soscht!

Nomol härzleche dank ond mer gseht sech.

Fabian

Hei Dani 🙂

D Empfehlig vo minere Schwöschter ond anderne Persone het sich eidüütig bewährt. Yey, 1x ond ich han die Prüefig em Sack gha 🙂 ! Ich glaub wörklich, dass du eine vo de Beste besch omenand! Emmer ruhig, geduldig ond zueverlässig hani dich ede Fahrstonde empfunde. Gschumpfe hesch höchschtens mal über anderi Verkehrsteilnehmer oder über die vele Boustelle 😉 Wiiterempfehle werd ich dich of all Fäll, de Tipp döf mer niemertem vorenthalte 🙂

Mer gseht sech velecht mal of de Stross 🙂 Witerhin no ganz e gueti Ziit!

GLG

Jolanda

Hoi Dani

Ich möcht dir no danke für dini Geduld, Rueh und eifach die super Fahrstunde. Hei bim erschte mal düre cho. Das hani vorallem dir zverdanke. Bin froh döfi jetz elei uf d strass, aber isch eifach perfekt gsi.

DAAAANKEEEE!!!!!!!

E gueti und schöni Ziit, und vorallem wiiterhin vil Geduld…

Liebi Grüess

Natanja

Sali Dani

Du gesch eim e gwössi sicherheit bem fahre, ned nur weg de brems uf de biifahrersiite. Ehner weg dinere starche persönlichkeit und dine tipps und tricks, wo mer i schwere situatione cha awände. Du besch eine wo spass het a sinere arbet. Dur das hesh mich immer chönne motiviere und mer gholfe, mis ziil schneller zerreiche.

Viele dank Dani, für dini tolli art als mensch und fahrlehrer, dank dir han ich mini prüefig bestande!

Ned zvergesse: DANIS FAHRSCHULE IST DEINE FAHRSCHULE !